1Ti 3 | LID | STEP | Idah badeh, jo tiye sahou handru: I buku none are lau aseken handru ta asahan ndramak ta atondrok lau ta Kindrei, lakou doh badeh, mwasin labai.

1 Timothy 3

Lau ta mwena ta atudun Kindrei ka-en hamon ta kandriyen mwasin

1 Idah badeh, jo tiye sahou handru: I buku none are lau aseken handru ta asahan ndramak ta atondrok lau ta Kindrei, lakou doh badeh, mwasin labai. 2 Ndramak ta atondrok lau ta Kindrei, iy badeh ki ndramak, ari ndra-in badan bwe, ya iy badeh, kasoh badih ari le, iy badeh, ki ndramak ta budon mwasin; ma iy badeh ki ndramak ta atondrok badan kudu mwasin. Ma iy badeh, ki ndramak nyaran mwasin handru, ma lau kamasiye iy, ma iy badeh, ki ndramak ta asumon lau mari kame asiu, ma hawe iy badeh, ki ndramak ta tanan ta leheya; 3 Ya iy badeh, sasahan lolo-ou ta gwa boto-on, ma iy badeh, sala ndramak ta ndrine reh. Arile, iy badeh, ki ndramak ta udu le, ma iy badeh, ki ndramak ta amekes mondrei; ma iy sala ndramak ta aseken luk labai. 4 Ma iy ale badeh, katondrok udun ma nadun kudu mwasin ma iy badeh, kaleheya nadun kanuhun sahou hawe kinoh iy. 5 I buku none are lau winiyan batondrok udun ma nadun bwe, iy winiyan batondrokei lau ta Kindrei bwe le. 6 Iy ale winiyan batondrok lau ta Kindrei bwe, buku iy barasahan lau ta Kindrei ai, bwe kameh, budon ta atudun iy kameh i tinan ma idah kameh iy anya, iy le. Ya, buku none iy amekes i buku aliy, idah kameh iy akohok maha-an kameh i le buku balik. 7 Nyaran badeh, ki mwasin ta ndranye lau mari. Ya, ki buku none bwe, badeh kameh iy akohok bwilima ma balik kameh sawei iy.

Oro lau ta seben badu bolo iri lau ta Kindrei kamekes kandriyen mwasin

8 Ya oro lau ta seben badu bolo iri lau ta Kindrei badeh, kandriyen toro ki mwasin labai, ma oro badeh, sala ndramak ta wasai. Oro sa-un gwa boto-on solo-an, iri aloh waen, ma oro samekes ndrakok ta luk toro. 9 Oro katawi sahou handru mene Kindrei tiye ta budon handru ma budon toro kaleu kudu mwasin. 10 Eme ya kanone oro op. I buku none oro ahas, oro winiyan ateu lahou ai. I buku none bwe badeh, oro sateu lahou.

11 Ma udu oro badeh, kandriyen toro ki mwasin, ma oro sasehek sahou ndra-in sala bada ndramak ari ari. Oro badeh, sala badih ta a-un gwa boto-on, ma oro badeh, kasehek sahou handru le ta bolo lahou mari.

12 Ndramak ta seben ta lau ta Kindrei badeh, kasoh badih ari le. Ya iy katondrok nadun ma udun kudu mwasin. 13 Are ndramak ta seben amekes lahou mwasin, nyaran kameh asahan mwasin, ma idah kameh iy winiyan asehek sahou boto-on ta budon handru ta Krais Jises.

Sahou handru

14 Jo abudon ta anya kewek katou ou suwi na len jo atorou la-ukei dah ewek tam. 15 Arile, i buku none jo bawek suwi bwe, sahou udu bolo la-ukei dah, winiyan tiye nyala to ta kandriyen ta to kudu mada kindrei udu bolo lau ta Kindrei ki buku sah. To badeh, lau ta Kindrei, ya iy badeh, kohan handru ta udu le buku doh. Tasah, to badeh, tawi sahou handru ta Kindrei i buku to abe-ei i loke i buku bek, udu le buku doh. 16 Lakou laba tinan ta Kindrei aton mene ndrasahan ndrame lewen asah idoh:

Jises Krais badeh, asahan ndrame awas,
Ma Malawin Ndrabun leheyani iy doh badeh, amwenen handru,
Ya eme iri angelo anyolom iy,
Ma iri lau tan atiye sahou ta nyalan i tiri lau badu kon munyak mari,
Ya iri lau badu kon munyak atehei budon tiri handru i tan.
Ano iy iu ili loken i kandrah,
ma atondrok lakou mari hawe taman.